2025 ވަނަ އަހަރުގެ ނޮވެމްބަރު މަހުގެ 06 ވަނަ ދުވަހަކީ ދިވެހިރާއްޖޭގައި ސައިކަލްގެ ވިޔަފާރިކުރަމުން އަންނަ ކުންފުންޏެއް ކަމަށްވާ އެލިއާ ކުންފުނީގެ ފަރާތުން ޔަމަހާ ބްރޭންޑްގެ ސައިކަލް ތަކެއް ބަރުކޮށްގެން ގދ.ނަޑެއްލާގެ ބަނދަރަށް ކައިރިކުރި ދުވަހެވެ. އެދުވަހު ހެނދުނު 10 ޖެހި އިރު ނަޑެއްލާގެ ބަނދަރުމަތީގައި އެމީހުން ކޭމްޕް ޖަހާ ބޮޑެތި ސްޕީކަރުތަކުން އެއްއަޑަކުން ބުނަމުންދިޔައީ " ސައިކަލް ގަނެގެން ބޯޓުގެ ނާލަށް ހޭދަކުރި ކުރުން ނިމުމަކަށް މިހެންނެވެ. " ތިޔަބޭފުޅުން ހިތްޕުޅާވާ ވައްތަރެއްގެ ސައިކަލެއް އަމިއްލަފުޅަށް ނަންގަވައިގެން ގެއަށް ގެންދާށެވެ. މިއީ ހަމަ އެލިއާގެ ބޭފުޅުން ގދ. އަތޮޅުގެ އެހެން ރަށްތަކުގައި މިޕްރޮމޯޝަން ކުރިއަށް ގެންދެވިއިރު ވެސް ބޭނުންކުރި ބަސްތަކެވެ. ރަތަފަންދޫއިން ނަޑެއްލާއަށް ފުރިއިރު ނަޑެއްލާއިން މާބޮޑު ތަރުހީބެއް ލިބިދާނެ ކަމަކަށް އެބޭފުޅުން ޤަބޫލެއް ނުކުރެވެއެވެ.
ނަޑެއްލާއަކީ ޒަމާނުއްސުރެ ފުލުހުންގެ ހިދްމަތް ނުލިބޭ ރަށެއްކަމުން އެއްގަމު ދަތުރު ފަތުރުގެ ޢާނޫނާއި އަދި އެހެނިހެން ޤާނޫންތަކަށްވެސް އިސްކަންދޭ މިންވަރު ވަރަށްވެސް ދަށެވެ. ރަށުގެ މަގުތަކުން ފެންނަ އެއްގަމު އުޅަނދުތަކަށް ބަލާލުމުން މިކަން ހާމަވެއެވެ. ހާލަތު ވަރަށް ދަށް އުޅަނދުތަކާއި އެއްވެސް ގޮތަކުން ރެޖިސްޓްރޭޝަން ބޯޑްނެތް އުޅަނދުތަކެވެ. މާލެއާއި އަތޮޅުގެ އެހެން ރަށްތަކުގައި އެހެން ކަންކަމާހެދި ޤާނޫން ތެރެއިން ރެޖިސްޓްރީ ނުކުރެވުމުން ނުއަގުގައި ގަނެގެން ގެނެސްފައި ހުރި އުޅަނދުތަކުން ރަށް އޮތީ ފުރާލާފައެވެ. ވާނީވެސް އެހެންތާއެވެ. " ނުބީހެންޏާ ކަނޑާ ހަމައެވެ. "
ދިވެހިރާއްޖޭގެ މީހުންއުޅޭ ހުރިހާ ރަށެއްގައި ފުލުހުންގެ ހިދްމަތް 2025 އޮކްޓޯބަރ މަހުގެ 20 ވަނަ ދުވަހުން ފެށިގެން ލިބިގެންދާނެ ކަމަށް ސަރުކާރުން ހަމަޖެއްސުމާއެކު މިދެންނެވި ދުވަހުން ފެށިގެން ނަޑެއްލާގައި ފުލުހުން ޤާއިމްވެގެން ތިބިގެން ނަޑެއްލާގައި ފުލުހުން ކުރިއަށް ގެންދެވުނު ހޭލުންތެރި ޕްރޮގްރާމް ތެރޭގައި ސްކޭމް މައްސަލަތަކުން ދުރުކުރުމަށް މަޢުލޫމާތު ދިނުމާއި އެފަދަ މައްސަލައެއް ދިމާވުމުން ޢަމަލުކުރާނެ ގޮތްތައް ކިޔައިދިނުމާއި، މީސްމީޑިއާ ބޭނުން ކުރުމުގައި ސަމާލުކަންދޭވީ ކަންތަކުގެ އިތުރުން " އެއްގަމު އުޅަނދު ދަތުރުފަތުރާ ބެހޭ ޤާނޫން " ގެ ަދަށުން މަގުމަތީގައި ދުއްވާ އުޅަނދުތައް ބަލައިފާސްކުރުމުގެ ހަރަކާތެއް ކުރައަށް ގެންދާނެ ކަމަށާއި، އެހަރަކާރުގައި އުޅަނދު ތަކުގެ ރަޖިސްޓްރީއާއި ނަމްބަރ ބޯޑާއި، ސްޓިކާތައް ހަމަތޯ ބެލުމުގެ އިތުރުން ލައިސަންސް ކަންތައް ބެލޭނެ ކަމަށް ބުނެދެވުނެވެ.
މިދެންނެވުނު " އެއްގަމު އުޅަނދުގެ ދަތުރުފަތުރާ ބެހޭ " ޤާނޫނުގެ ދަށުން އެއްގަމު އުޅަނދުތައް ބަލައިފާސްކުރުމަށް ނަޑެއްލާއަށް ގިނައަދަދެއްގެ ފުލުހުން ވަޑައިގެންނެވި ދުވަހާއި އެލިއާގެ ބޭފުޅުން ނަޑެއްލާގައި ސައިކަލްގެ ޕްރޮމޯޝަން ހަރަކާތް ކުރިއަށްގެންދިޔަ ވަގުތާއި ދިމާވީ އިއްތިފާގުން ކަމަށް ބައެއް ބޭފުޅުންނަށް ހީކުރެވުނުއިރު އަނެއް ބަޔަކު ދެކެނީ އެކަން އެހެން ދިމާވީ ނަޑެއްލާގެ ރައްޔިތުންގެ " މަންފާ " އަކަށެވެ. ޒަމާނުއްސުރެ ޤާނޫނެއް ޤަވާއިދެއް ނެތި އެމީހަކު ހިތުހުރި ގޮތަކަށް ރެޖިސްޓްރީއެއްނެތި ނަޑެއްލާގައި ދުއްވަމުން އައި އުޅަނދުތަކަށް " ޓާޓާ " ކިޔާލި ދުވަހެވެ.
އެލިއާ ކުންފުނީގެ ފަރާތުން ރާއްޖޭގެ އެކި ކަންކޮޅު ތަކުގައި ކުރިއަށް ގެންދަމުން އަންނަ މިޕްރޮމޯޝަން ނަޑެއްލާގައި ކުރިއަށް ގެންދެވުނު ދުވަހަކީ އެކުންފުނި ވިޔަފާރީގެ ތާރީހް ތެރެއަށް ވައްދާ ބޮޑު " ނަފާ " އެއް ގެނުވި ދުވަހެވެ. މިހާތަނަށް އަތޮޅުތެރޭގެ ރަށެއްގައި އެކުންފުނީގެ ފަރާތުން އެތެރެކުރާ ސައިކަލްތަކަށް އާއްމުންގެ ތަރުހީބު އެއްރަށަކުން އެންމެ ގިނައިން ލިބުނު ފުރަތަމަ ފަހަރެވެ. އެކުންފުނީގެ ފަރާތުން އެކަމާ އުފާ ނުކުރާންވީ ސާބަބެއްވެސް ނެތެވެ. ގދ. ނަޑެއްލާގެ ރައްޔިތުން އެމީހުންގެ އަތުން 18 ސައިކަލް ގަތުން ވެގެންދިޔައީ ނަޑެއްލާކަހަލަ މީސްމަދު ކުޑަ އާބާދީއެއް އޮންނަ ރަށަކުން ލިބުުނު ވަރަށްބޮޑު ކުރިއެރުމަކަށެވެ. ފުލުހުންގެ ފަރާތުންވެސް ބުނަމުންދިޔައީ ހަމަ މިފަދައިންނެވެ. ހަވީރު 16:00 އިން ފެށިގެން 80 މިނިޓްއަށް ކުރިއަށް ގެންދެވުނު ޓްރެފިކް އޮޕަރޭޝަނުގައި 43 އުޅަނދު ބަލައި ފާސްކޮށް ރަނގަޅު ކުރަންހުރި ކަންތައް ކިޔައިދެވުނު އިރު ފުލުހުން އަތޮޅުގެ އެހެން ރަށްތަކުގައި ކުރިއަށް ގެންދާ މިފަދަ އޮޕަރޭޝަންތަކާ އަޅާކިޔާއިރު މިއީ ނަޑެއްލާކަހަލަ އާބާދީގައި 1200 ހަމަނުވާ ރައްޔިތު މީހުން އުޅޭ ރަށަކަށްބަލާއިރު އެތައް ގޮތަކުން ވަރަށް ބޮޑޮ ހެޔޮ ފާލެއް ކަމަށް އެބޭފުޅުން ދެއެކެވެ. އެދުވަހު އެއޮޕަރޭޝަނުގައި ބައިވެރިވި ފުލުހުން ޤަބޫލުކުރަނީ މީސްކޮޅު މަދު އާބާދީގައި ބޭނުންކުރާ ގިނަ އަދަދެއްގެ އެއްގަމު އުޅަނދު އެދުވަހު އެކުޑަ ވަގުތު ކޮޅުގައި ބަލައި ފާސްކުރެވުނީ އެރަށުގެ ރައްޔިތުން ޤާނޫނާއި ޤަވާޢިދުތަކަށް ހުރުމަތްތެރިކަން ހިތާ މިންވަރު އެގިގެން ދިޔަ ކަމެއްގެ ގޮތުގައެވެ.
މިއަރު ތެރޭގައި އެލިއާގެ ފަރާތުން ފުވައްމުލަށް ސިޓީގައި މިހަރަކާތް ކުރިއަށް ގެންދެންނެވުނު ނަމަވެސް ވިކިފައިވަނީ އެންމެ 09 ސައިކަލެވެ. ނަަޑެއްލާގެ ހަރަކާތުން 18 ސައިކަލު ވިއްކައިގެން އެބޭފުޅުންނަށް ބޮޑު " ނަފާ " އެއް ލިބިގެން ދިޔައިރު ނަޑެއްލާގެ ރައްޔިތުންނަށް " މަންފާ " އެއްގެ ގޮތުން ލިބިގެންދިޔަ ހިތްހަމަ ޖެހުމެއްކަމަށް ނަޑެއްލާގެ ރައްޔިތުން ޤަބޫލުކުރަނީ އެބޭފުޅުންނަށް ޤާނޫނާއި ޤަވާޢިދާ އެއްގޮތަށް ހުރި އުޅަނދުތަކެއް ހެޔޮ އަގުތަކެއްގައި ޔަޤީންކަމާއެކު ލިބިގެން ދިޔުމެވެ.
ޚިޔާލު