މާތް ނަބިއްޔާ صلى الله عليه وسلم މީގެ 1400 އަހަރު ކުރިން، އުރުދުންގެ ސަހަރާގައި ހުންނަ، މި ގަހުގެ ދަށުގައި އިށީނދެވަޑައިގެންނެވިއެވެ!
ގަހުގެ ވަށައިގެން ސަހަރާގެ ތެރެއަށް ބަލާލުމުން، އެއީ އެ ސަހަރާގެ މެދުގައި އިން ހަމައެކަނި ގަސްކަން ފާހަގަ ކުރެވޭނެއެވެ. އެ ގަސް، މިއަދާއި ހިސާބަށް ދިރިހުރި ގޮތާ މެދު ސައިންސްވެރިންވެސް ވަނީ އަޖާއިބު ވެފައެވެ. އެހެނީ އެތައް ކިލޯމީޓަރެއްގެ ދުރަށް ބަލާލުމުންވެސް އެނޫނީ ދިރުމެއް އަދި ފެހިކަމެއް، އެ ސަހަރާއަކުން ނުފެނެއެވެ.
ކީރިތި ރަސޫލު الله صلى الله عليه وسلم، އެކަލޭގެފާނުގެ ބޮޑުބޭބޭފުޅު އަބޫ ޠާލިބާއެކު ސީރިޔާއާއި ދަތުރުކުރައްވަމުން އެ ގަސްދޮށުގައި މަޑުކުރެއްވިއެވެ. އޭރު އެކަލޭގެފާނު ޢުމުރުފުޅުން އެންމެ 9 އަހަރުފުޅެވެ. އެދުވަސްވަރު އެ ހިސާބުގައި ހުރި ނަސާރާ ފައްޅިއެއްގައި އުޅުނު ބަހީރާއޭ ކިޔުނު ފާދިރީއަކަށް، އެންމެފަހުގެ ރަސޫލާ "އަލްބުޤަވިއްޔާ" އޭ ކިޔުނު، މި ގަސްދޮށަށް ފައިބާ ވަޑައިގެން މަޑުކުރައްވާނެ ކަމުގެ ޚަބަރު އޮތީ، އިހުގެ ފަށްފުށްތަކުން ލިބިފައެވެ. އެހެންކަމުން، ބަހީރާ، އެ ގަސްދޮށަށް ފައިބާ ހިޔާވަހިކަން ހޯދާ މީހުންނަށް އިންތިޒާރުކޮށް، އެއިން އެއްވެސް މީހެއްގެ ކިބައިން ނަބީކަމުގެ ޢަލާމާތެއް ފެނޭތޯ ބަލާހަދައެވެ. ނަމަވެސް އެއްވެސް މީހެއްގެ ކިބައިން އެފަދަ އެއްވެސް ނިޝާނެއް އެހާތަނަށް އޭނާއަށް ފެނިފައި ނުވެއެވެ.
އެދުވަހު، ގާފިލާއެއް އައިސް، އެ ގަހުން ހިޔާވަހިކަން ހޯދުމަށް އެ ގަސްދަށުގައި މަޑުކުރިއެވެ. ސަހަރާގެ ގަދަ ހޫނުން، މާތް ނަބިއްޔާ صلى الله عليه وسلم އަށް ހިޔާވަހިކަން ފޯރުކޮށް ދިނުމަށްޓަކައި، ގަހުގެ ގޮފިތައް އެކަލޭގެފާނު އިންނެވި ދިމާލަށް ވަޔާއެކު ގެންދާތަން ފެނުމުން، އެއީ އެންމެފަހުގެ ރަސޫލާކަން، ބަހީރާއަށް ދެނެގަނެވުނެވެ. އަދި ހަމައެއާއެކު ރަސޫލާ صلى الله عليه وسلم ގެ މައްޗަށް ހިޔާއެޅުއްވުމަށްޓަކައި މަތީގައި ވިލާގަނޑެއް އުފެދިފައިވާކަންވެސް ބަހީރާއަށް ފެނުނެވެ.
މިކަންކަން ފާހަގަ ކުރެވުމުން ބަހީރާ، އަބޫ ޠާލިބުގެފާނުގެ އަރިހަށް ވަޑައިގެން، އެކަލޭގެފާނުގެ ކޮއްކޯފުޅަކީ އެންމެފަހުގެ ނަބިއްޔާކަމާއި، އަދި އެކަލޭގެފާނަކީ މީސްތަކުންނަށާއި އަދި މުޅި އިންސާނިއްޔަތަށް ރަހުމަތާއި ތެދުމަގު ދައްކަވާނޭ ބޭކަލަކަށް ވާތީ، އެކަލޭގެފާނުގެ ޢަދާވާތްތެރިންގެ ކިބައިން، އެކަލޭގެފާނު ސަލާމަތްކުރައްވާ، ރަނގަޅަށް ބެލެހެއްޓުމަށްވެސް ވަސިއްޔަތް ކުރިއެވެ!
މިގަހަކީ، الله ގެ ރަސޫލާ صلى الله عليه وسلم އަށް ހިޔާވަހިކަން ދެއްވި ގަހަކަށް ވުމުން، މީސްތަކުން މި ގަހަށް ކިޔަނީ، މިއީ "ދިރިހުރި އެންމެފަހުގެ ޞަޙާބީ' ކަމުގައެވެ. ތެދެކެވެ. އެކަލޭގެފާނުގެ ޙަޔާތްޕުޅުގައި، އެކަލޭގެފާނާއި ބައްދަލުވެ، ދިރިދުނިޔޭގައި ހުރި ހަމައެކަނި ދިރޭ އެއްޗަކީ މި ގަހެވެ. ސުބްޙާނަ الله!
ޚިޔާލު