އެދުރުނަށް ޝުކުރިޔާ
**************
މާދަމާގެ މުސްތަގްބަލް ކަމުގައިވާ މިތުއްތު ދަރިވަރުންނަކީ މާދަމާ އަޅުގަނޑުމެންގެ މިޤައުމު ބިނާކޮށް އާރާސްތުކުރަންތިބި ﷲ އަޅުގަޑުމެންނަށް ދެއްވާފައިވާ އަގު ބޮޑު ނިއުމަތެކެވެ. އެކަލާންގެ އަޅުގަނޑުމެންނަށް މަތިކުރެވިފައިވާ މިއަމާނާތައް ހިޔާނާތްރިނުވެ ހެޔޮ ގޮތުގައި މި އަގުބޮޑު ނިއުމަތް ޝުކުރާއެކު ބަލައިގަނެ އޭގެ ބޭނުން ހެޔޮ ގޮތުގައި ހިފަމާތޯ..
ކޮންމެ ދަރިވަރަކީ ވަކި ވިސްނުމަކާއި، ވަކި މިޒާޖެއް ލިބިގެން ހެދި ބޮޑުވަމުން އަންނަ ދަރިވަރެކެވެ. ވަކި ވަކި ކިލާސްތަކަށް ބަލާލި ކަމުގައިވިޔަސް މިކަންތައް ފެނިގެން ދާނެއެވެ. ހަމައެއާއެކު މިކަންތައް އެންމެ ރަނގަޅަށް އެގިގެންދާނީވެސް އެކުދިން އެންމެ ޅަފަތުން ފެށިގެން އުގަންނައި ދިނުމުގައި އެކުދިންނާއެކު ވަގުތު ހޭދަކުރަމުންދާ ކެތްތެރި މުދައްރިބުން ނުވަތަ އަޅުގަނޑުމެން ފަޙްރުވެރިވާ ޓީޗަރުންނެވެ. ކުއްޖަކު ސްކޫލަށް ގަޑިއަށް ފޮނުވާފަ އެކުއްޖަކު ނިމޭ ގަޑިއަށް ބަލައި ދިޔުމަކީ ބެލެނިވެރިޔާގެ ހަމައެކަނި ޒިންމާއެއް ކަމުގައި ނަހަދާށެވެ.
ކުއްޖަކު ސްކޫލުގައި ހަމައެކަނި ހޭދަކުރާ 2 ގަޑިއިރަކުން ނުވަތަ 4 ގަޑިއިރަކުން ގިނަ ކަންތައްތަކެއް ދަސްވާނެ ކަމަށް ބައެއް ބެލެނިވެރިންނަށް ހީވެދާނެްެވެ. ނަމަވެސް އެއީ މުޅިން ކުށްހީއެކެވެ. ބައެއް ކުދިން އެކުދިން ކޮންމެ ދުވަހަކު ސްކޫލުގައި ޓީޗަރު އެކީގައި ހޭދަކުރާ ވަގުތަކީ އެކުއްޖަކު ގޭގައި އާއިލާއެކީގައި ހޭދަކުރި ވަގުތު " އޮބްޒާވް " ކޮށް އޭގެ ރަނގަޅު ނުބައި ގިންތި ކުރަން ބޭނުންކުރާ ވަގުތެއް ކަމުގައި ބައެއް ކުދިން ހަދައެވެ. ނުވަތަ އާއިލާގެ ވަކިވަކި ފަރުދުން " އެކޮއްކޮ " އާއި ދޭތެރޭގައި ކަންތައް ކުރިގޮތް ޓީޗަރުއަށް ކިޔައިދީ އެކަމުގެ ހެޔޮ ރަނގަޅު ގޮތް ހޯދުމަށް އުޅެއެވެ.
ހެދިބޮޑުވަމުން އަންނަ އަޅުގަނޑުމެންގެ މިތުއްތު ދަރިން " ސްކްރީން ޓައިމް" އާއި ދުރު ކުރަން ވިސްނަން އެބަޖެހެއެވެ. މަންމަ ނުވަތަ ބައްޕަ ކަމެއްގަ ޝާމިލްވެ އުޅެންޖެހުމުން އެކުދިން ގެންގުޅޭ އައިޕެޑް ނުވަތަ މަންމަ ފިލްމަކަށް ދާންވީމަ ގެންގުޅޭ ފޯންދީފަ ދިޔުން ހުއްޓާލަން އެބަޖެހެއެވެ. އެއްދުވަހު އައިޕެޑްގަ ގޭމް ކުޅުމާއި ކާޓޫން ބެލުން ހުއްދަވެފައި އަނެއް ދުވަހު ކާޓޫން ބެލުމާއި ގޭމް ކުޅުމަކީ ކުޑަކުދިން ކުރަންވާ ކަމެއް ނޫންކަން ބުނެ މަނާކުރުމުން އެކުދިންނަށް މިދަސްކޮށްދެވެނީ ކޮންކަމެއްތޯ ވިސްނާލާށެވެ. މަންމައެކީ އެއްދުވަހު ފިހާރައަށްގޮސް އަނެއްދުވަހު ދައްތައެކީ ފިހާރައަށްދާން ބުނުމުން ކުޑަކުދިން ފިހާރައަށް ނުދާނެކަމަށް ބުނުމުން މަންމައެކީ ފިހާރައަށް ދާންވީމަ ބޮޑުވެފަ އެހެން މީހަކާއެކީ ދާންވީމަ ކުޑަވަނީ ހެއްޔެވެ؟ މިކަހަލަ ކަންތައް ވާނަމަ ދަރިންގެ ސިކުނޑިތަކަށް ވަދެގެންދާނީ އެހެން ވިސްނުން ތަކެކެވެ. ފެނިގެންދާނީވެސް އެހެން މަންޒަރު ތަކެކެވެ.
ދަރިންގެ ސިކުނޑިއަކީ ވަރަށްވެސް ކުޑަ އެހާމެ ނާޒުކު އެއްޗެކެވެ. އެސިކުނޑި ތަކުގައި ރޯކޮށްފައިހުރި ދަންމަރުތައް ނުނިވޭހެން އަމަލުތައް ބަހައްޓަނީވެސް ހަމަ އަޅުގަނޑުމެންނެވެ. ލޮބުވެތި މުދައްރިސުންނާއި ލޯބިވާ މައިންބަފައިންނެވެ. ގޭގައި ހޭދަކުރާ ވަގުތު އެކުދިން ހިތްހަމަ ޖައްސައި ދިނުމަށް ދައްކާލެވޭ ކާޓުނަކީ ކޮންކަހަލަ މެސެޖެއް އެކުދިންނަށްދޭނެ ކާޓޫނެއްތޯ ބެލުމަކީ މައިންބަފައިންގެ ޒިންމާއެކެވެ. ގޭގައި ހޭދަކުރެވޭ ވަގުތު ތަކުގައި އެކުދިންނާއެކު މައިންބަފައިންނަށް ހޭދަކުރެވެނީ ކިހާ ވަގުތެއް ކަމުގައި އަމިއްލައަށް ވަޒަން ކޮށްލާށެވެ. ބައްޕަ ފޯނާއި ކުޅެން އޮވެފައި މަންމަ ޑްރާމާ ބަލަން އިދެ ނަމާދު ވަގުތު ޖެހުމުން ދަރިފުޅު ގާތުގައި ނަމާދަށްދާން ބުނުމުން އެކުއްޖާ ހިތަށް އަރާނީ ކީކޭބާއެވެ؟ އޭގެ ބަދަލުގައި ނަމާދު ވަގުތު ޖެހުމުން މަންމަ ނުވަތަ ބައްޕަ ދަރިފުޅާ ނަމާދަށް ދާންހިގާށޭ ބުނުމުން އެކުއްޖާވެސް އެކަން ކުރަން ޝައުގުވެރިކަން ހުންނަ ވަރު އެގުމުގެ އިތުރުން މައިން ބަފައިން ނަމާދު ކުރުމަށް އަހަމިއްޔަތުދޭ މިންވަރުވެސް ހާމަވެގެން ދާނެއެވެ.
ކޮންމެ ކުއްޖަކީ ކިޔެވުމަށް މޮޅު ކުއްޖަކަށް ނުވާނެއެވެ. މިކަން އެންމެ ރަނގަޅަށް ކިލާހުގެ ޓީޗަރުއަށް އިނގޭނެއެވެ. ކުއްޖާ ދުވަހުން ދުވަހުން ނިންމަން ހަވާލު ކުރެވޭ މަސައްކަތް ނުނިގެން ކުއްޖާގެ ޝަކުވާ ބެލެނިވެރިޔާ ގާތުގައި ކުރުމަށްވުރެ ކުއްޖާ އެމަސައްކަތް ނުނިމުނު ސަބަބު ޓީޗަރުއާއި ބެލެނިވެރިޔާ ދެމީހުންވެގެން ހޯދާށެވެ. އެހެނީ ކުއްޖާގެ ކިޔެވުމަށް އަންނަ ބަދަލާއި މިޒާޖަށް އަންނަ ބަދަލު އެންމެ ރަނގަޅަށް އިނގޭނީ ކިލާހުގެ ޓީޗަރަށް ކަމަށްވާތީއެވެ. ކުއްޖާއަށް ކުރެވޭ ރަނގަޅު ކަންތައް ފާހަނގަ ކުރާށެވެ. ގޯސްޖޮށް ކަމެއް ކުރެވުމުން އެވާހަކަ ދެއްކުމުގެ ބަދަލުގައި އެކުއްޖަކަށް އެގޮތަށް ކަންތައް ކުރެވުނު ގޮތް އެކުއްޖެއްގެ ގާތުން އަހައި އޮޅުން ފިލުވާށެވެ.
ގޭތެރޭގެ މާހައުލުންން ކުއްޖާއަށް އަންނަ ބަދަލު ޓީޗަރުއާއި ހިއްސާކުރާށެވެ. ކިލާހުގައި އުޅޭ އުޅުމުގައި ކުއްޖާގެ ފަރާތުން މިޒާޖަށް ބަދަލުތަކެއް އަންނަ ކަމަށްވާނަމަ އެކަން މައިންބަފައިނާ ހިއްސާކޮށް އެކަމުގެ އަލިމަގެއް ހޯދުމަށް މަސައްކަތް ކުރާށެވެ. ޓީޗަރުންނަކީ އެކުދިންގެ ދެވަނަ މައިންބަފައިންނަށް ވާއިރު މައިންބަފައިން ތިމާގެ ދަރިއަކަށް ދެރައެއް ލިބޭކަން ނޭދޭ ހާލު އެއްވެސް ޓީޗަރަކު އެޓީޗަރަކު ކިޔަވައިދޭ ދަރިއަކަށް ދެެރައެއް ލިބޭކަށް ނޭދޭނެކަން ޔަޤީނެވެ. އަޅުގަނޑުމެން އެންމެންނަކީ ދަރިންދެކެ ލޯބިވާ މައިންބަފައިންނާއި، މުދައްރިސުން ކަމުގައި ލައްވައި އެކުދިންނަށް ހެޔޮގޮތް މިންވަރު ކުރެއްވުންއެދި ﷲ ގެ ހަޞްރަތުގައި ދުޢާކުރަމެވެ. އާމީން....
ޚިޔާލު